Թաթարստանի Ինոպոլիսի դպրոցի ուսուցիչների խումբը կրթահամալիրում է

Հեղինակային կրթական ծրագիրը՝ որպես այլընտրանքային, տարբերվող կրթական ծրագիր, հետաքրքիր է նաև հայաստանյան իրականությունից դուրս: 

Այսօր կրթահամալիրն ընդունեց Թաթարստանից ժամանած ուսուցիչների նախագծային խմբին: Սովորության համաձայն՝ հյուրերին դիմավորեցինք Սուրբ Երրորդություն եկեղեցու բակում: Շփման լեզուն ռուսերենն էր: Հանդիպման և շրջայցի նպատակը հեղինակային կրթական ծրագիր իրականացնող ուսումնական հաստատության մոդելին ծանոթանալն էր:  Եկեղեցում մասնակցեցինք ,,Ուսումնական պատարագ,, նախագծին: Մի հատված դիտե՛ք այստեղ.

Կրտսեր դպրոց-պարտեզ մոդելին ծանոթանալու համար քայլեցինք Հյուսիսային դպրոց-պարտեզ, որտեղ Քնարիկ Ներսիսյանը ներկայացրեց այս մոդելի առանձնահատկությունները, Գեղարվեստի դպրոցը՝ իր արհեստանոց, արվեստանոց-լաբորատորիաներով: Չնայած կրթահամալիրն այս պահին հեռավար կրթություն է իրականացնում՝ բոլոր լաբորատորիաներում փոքր խմբերով պարապմունքներ էին: Հյուրերին հատկապես հետաքրքրեց Ոսկերչության արհեստանոց- լաբորատորիան. ուսուցիչը՝ ընկեր Դավիթը, սահուն և վստահ ռուսերենով մանրամասն ներկայացրեց իրենց գործունեությունը, ներկա սովորողները ցուցադրեցին իրենց արած աշխատանքները, նաև տվյալ պահին արվող աշխատանքը: Թաթար գործընկերները զարմացած էին, քանի որ չէին պատկերացնում, որ այդքան փոքր տարիքից կարելի է զբաղվել ոսկերչությամբ: 

Սարալանջ-Սասնալանջով քայլեցինք Քոլեջ: Սարալանջում ընթանում էին աշնանային այգեգործական աշխատանքները: Օտարերկրացի գործընկերներին ներկայացվեց աշխատանքների էությունը, դրանց ուսումնական բաղադրիչը, խաղողի փոքրիկ այգին, քանդակների պատմությունը: Սրանք բոլորը տարբեր ուսումնական նախագծերի արդյունքներ են: 

Քոլեջում կարճ շրջայցից, կրթական ծրագրից խոսելուց հետո այցելեցինք Խաղողի և Գինու դպրոցի լաբորատորիա, որտեղ հանդիպեցինք Տիար Բլեյանին: Ամբողջ հանդիպման ընթացքում խոսել էինք խաղողի այգիների մշակման, գինու ստեղծման մասին, և ահա հյուրերը հնարավորություն ունեցան տեղում համտեսելու, հյուրասիրվելու, երաժիշտ դասավանդողների, սովորողների հետ մասնակցելու փոքրիկ ծեսի, հայերեն լեզվով երգելու, հաճելի զրույց ունենալու կրթահամալիրի հիմնադիր Տիար Բլեյանի հետ: Տպավորությունները շատ էին, թաթար գործընկերն ասացին, որ Հայաստանում երեք տարբեր դպոցներում են եղել, սակայն  մեր կրթական ծրագիրն իր ֆորմատով առանձնահատուկ է, տպավորիչ: 

Հետագա համագործակցության համար փոխանակվեցինք տվյալներով, էլ. փոստերով: 

Ամփոփելով օրը՝ ասեմ, որ նման հանդիպումները տարբեր մշակույթների տեր մարդկանց շփվելու հնարավորություն են տալիս, նոր համագործակցությունների սկիզբ են, անսպասելի բացահայտումներ են բերում: Լավ էր, որ թաթար գործընկերներն էլ հանդիպմանը չնայեցին որպես ուղղակի ծանոթություն, այլ հնարավոր հեռանկարներ էին մտմտում, փնտրում: 

Լուսանկարներ՝