Տաթև: Հերթապահի օրագիր

среда, 4 августа 2021 г.

Հերթապահի օրագիր

Օրը սկսեցի Միջին դպրոցի բակից. կանաչը նկատելի շատացել է, բոլոր անկյուններում ոռոգման կաթիլային համակարգով տարածվող առատ ջուրն էր: Ինչ խոսք, հաճելի թարմություն էր:

Տիկին Գայանեի հետ սեղանը, միջանցքը ախտահանելուց, փոշիները հավաքելուց հետո միացրի համակարգիչը, քիչ անց սկսեցին գալ տարբեր հարցերով այցելուները: Օրը մարդաշատ էր. հետաքրքրվում էին և՛ Միջին դպրոցի ընդունելությամբ, և՛ Ավագ դպրոցի ընդունելությամբ: Հարցերին պատասխանելուց հետո ուղեկցեցի գրասենյակներ:

Այցելեցին նաև կրտսեր դպրոցի վայրը խառնած կամ կորցրած ծնողներ. բնական է, կրթահամալիրի յոթ շենքերը շփոթություն են առաջացնում, հատկապես երբ նոր ես այս միջավայրում: Այս դեպքերում նույնպես մանրամասն ներկայացրել եմ հասցեները, փոխանցել հեռախոսահամարներ, անհրաժեշտության դեպքում՝ ուղեկցել:

Կեսօրին մոտ հասցրեցի շփվել նաև Հյուսիսային դպրոցից Միջին դպրոց տեղափոխված սովորողի հետ, ով եկել էր ուսումառության պայմանագիրը ստորագրելու, բայց հարմար առիթ էր նաև գրադարանից ընթերցանության գիրք ընտրելու համար: Ընտրած գիրքն , իհարկե, ,,Հարրի Փոթթերն,, էր. հենց գրքի շուրջ էլ զրուցեցինք:

Կեսօրից հետո Միջին դպրոց այցելեց տիար Բլեյանը: Իսկ այդ ընթացքում Փառատոնային պուրակում սիրուն տեղավորվել էր 181 դպրոցի սովորողների մի խումբ՝ տղաներ և աղջիկներ, նույն դասարանից, ընկերներ էին, որոշել էին հավաքվել, իրար տեսնել, պիկնիկ անել, ծածկոցներ էլ էին բերել: Անմիջական զրուցեցին, հրավիրեցին, հյուրասիրեցին, հաստատեցին, որ սիրով են այստեղ գալիս, իսկ ավարտելուց հետո անպայման կհավաքեն պուրակը : Այսպիսին է կրթահամալիրի բաց միջավայրը ՝ գրավիչ Բանգլադեշ համայնքի համար: Եվ տարիներ առաջ, երբ հանվեցին բոլոր ցանկապատերը, նպատակը հենց սա էր, որ միջավայրը լինի բոլորի համարը, որ այսպիսի փոքրիկ խմբերը անարգել նստեն խոտերի մեջ, վայելեն, ներառվեն...