Հոկտեմբերյան վերապատրաստումների հաշվետվություն

Վերապատրաստումների օրացույցի համաձայն հոկտեմբերի 10-12-ը կրթահամալիրում տեղի ունեցավ դասվարների, տեխնոլոգների, կազմակերպիչների, երաժիշտներ վերապատրաստման հերթական փուլը: Վերապատրաստմանը մասնակցել է 28 դասավանդող Արարատի, Արամավիրի և Արագածոտնի մարզերից: Գիշերակացով մնալու համար դիմել են երկու մասնակից, ովքեր հյուրընկալվել են Արևմտյան դպրոցի կրթական փոխանակումների կացարանում: 
Մասնակիցներն ըստ մասնագիտությունների

• 4 տեխնոլոգ
• 1 երաժիշտ  (ևս մեկ հոգի ներկայացավ երկրորդ օրը, չի գրանցվել)
• 6 կազմակերպիչ
• 17 դասվար 

Քանի որ վերապատրաստումների օրերը համընկնում էին, կազմել եմ միասնական ծրագիր, որի հիման վրա Սվետա Ճաղարյանը, Լուսինե Փաշայանը, Մարիամ Աղաբաբյանը կազմել են արդեն անհատական նախագծերով և մանրամասն ծրագրերով իրենց համակարգած վերապատրաստումների ծրագրերը: 

Վերապատրաստման առաջին օրը՝ հոկտեմբերի 10-ին, վերապատրաստվողները եղել են կրթահամալիրի կրտսեր և միջին դպրոցներում, ծանոթացել և մասնակիցն են եղել հեղինակային կրթական ծրագրի իրականացման աշխատանքներին: Հաջորդ երկու օրերը ոչ աշխատանքային էին, կազմվեց նախորդներից մի փոքր տարբերվող ծրագիր՝ համատեղ պարապմունքներով, մարզական պարապմունքով և մասանգիտական սեմինարներով: Ընդմիջումը նույնպես կազմակերպվել է մասնակիցների միջոցով՝ որպես ինքնասպասարկում: 

Վերապատրաստման բովանդակությունը ներառում էր 

• Հեղինակային կրթական ծրագրով բաց միջավայրին ծանոթացում 
• Դպրոցը ծեսի բաց արվեստանոց
• Հեղինակային կրթական ծրագրով աշխատանքային նախագծերի իրականացում 
• Երաժշտություն, պարերգեր 
• Տեխնոլոգիական նախագծեր
• Մարզական պարապմունք
• Բլոգը որպես ուսումնական գործիք, ներկայացում, ստեղծում, վարում 

Վերապատրաստման մասնակիցները կարևորեցին դպրոցներում, դասարաններում իրականացվող նախագծերին մասնակցելը, քանի որ իրենց համար այդպես ավելի տեսանելի և հասկանալի էր կրթահամալիրը՝ իր հեղինակային կրթական ծրագրով: 

Վերապատրաստման երրորդ օրը սկսեցինք Սուրբ Երրորդություն եկեղեցում, որտեղ վերապատրաստվողները մասնակցեցին առավոտյան ժամերգության: Չնայած օրը ոչ աշխատանքային էր, բայց մասնակցեցին և երգեցին նաև մի խումբ սովորողներ և ծնողներ: Վերապատրաստվող ուսուցիչներից մի քանիսը ցանկություն հայտնեցին իրենց դասարանական խմբերի հետ այցելել աստղացուցարան և իրականացնել համատեղ նախագծեր: 

Վերապատրաստումն ամփոփվեց Ագարակում, որտեղ հանձնվեցին նաև վերապատրաստման վկայականները: 

Վերապատրաստման հետ կապված դիտարկումներ և առաջարկներ 

• Մասնակիցների մեծ մասը մեդիահմուտ չէ, շատերը չեն կարողանում օգտագործել նաև էլ. փոստը: Նման իրավիճակում բլոգի ստեղծումը և վարումը կարող է մնալ որպես լրացուցիչ պարապմունք նրանց համար, ովքեր պատրաստ են և ցանկանում են ունենալ բլոգ: 
• Կազմակերպիչների համար կազմել առանձին ծրագիր (ինչպես այս անգամ արել էր Մարալ Կարապետյանը)՝ ավելի մանրամասն, քանի որ իրենց՝ տեխնոլոգների հետ համատեղ պարապմունքներն այնքան էլ արդյունավետ չեն: 
• Կարծում եմ՝ հաջորդ վերապատրաստմանը կարելի է ընդգրկել նաև գրադարանավարներին: Նման առաջարկ եղավ նաև դպրոցների տնօրենների կողմից, եզրակացնում եմ, որ կլինեն մասնակիցներ: Լուսինե Ալեքսանյանը նույնպես առաջարկեց գրադարանավարների վերապատրաստում: 

Յուրաքանչյուր օրվա ավարտին հրապարակվել են օրվա լուսաբանումները, տեսանյութերտ, ռադիոնյութերը, պատումները. 

Առաջին օրվա լուսաբանում

Երկրորդ և երրորդ օրերի լուսաբանում 

Վերապատրաստման ավարտից հետո համատեղ նախագիծ իրականացվեց Կոշ դպրոցի հետ. Հասմիկ Մաթևոսյանի հաշվետվությունը:

Նախադպրոցական հաստատությունների մանկավարժական աշխատողների վերապատրաստում: Հրապարակվել է ծրագիրը:
Յուրաքանչյուր օր լուսաբանվել է
Առաջին օր
Երկրորդ օր
Երրորդ օր
Չորրորդ օր 
Նելի Արղությանի ամփոփումը