Հունվարյան ճամբարի հաշվետվություն

Ինչպես միշտ, երբ միևնույն գաղափարի շուրջ հավաքվում են հետաքրքիր և ոգևորված մարդիկ, ամեն ինչ հեշտ ու արագ է ստացվում, իսկ ոգեշնչված մտքերը իրականություն են դառնում: 

Այսպիսով, սկսվեց մեր հունվարյան ստուգատեսային ճամբարը: Հիմնական նախագիծը, որն արդեն գաղափար էր դարձել մեզ համար, թատերական նախագիծն էր: Իհարկե, այդքան էլ հեշտ չէ թատրոն բեմադրելը, բայց համառության և աշխատասիրության արդյունքում հնարավոր է ունենալ տեսանելի արդյունք: Նախ աշխատեցինք սցենարի վրա, այս անգամ ոչ թե կոնկրետ ստեղծագործություն էինք վերցրել, այլ ամբողջական սցենարը, գործողությունները մենք էինք հորինել, ինչն ավելի բարդ է: Միայն մեկ շաբաթ ծախսվեց սցենարային աշխատանքների, բոլոր տեսարանները հատ -հատ հորինելու, կերպարների վրա աշխատելու ուղղությամբ: Պարտադիր պայման էր, որ դեր պետք է ունենան ջոկատի բոլոր անդամները: Սցենարը կազմելու ամբողջական աշխատանքն իր վրա վերցրեց Հայկ Աղլամազյանը, իսկ հետո մաս- մաս աշխատեցինք կտորների վրա: 

Սկսվեցին փորձերը. ամեն փորձը մյուսից տարբերվող, նոր իմպրովիզներով, դերին այլ տեսանկյունից տեսնելու հայացքով: Արդյունքում կերպարները մշակվեցին, խոսքերն ավելի կոնկրետացան, թվաց՝ պատրաստ ենք: 

Սկսվեց դերերին համապատասխան հագուստներ պատրաստելու գործընթացը, որում մեզ օգնեց ընկեր Հասմիկը: Երեք-չորս դասաժամ տեխնոլոգիայի լաբորատորիայում տարբեր գույների ֆետրերից ստացվում էին մեր կերպարները, կախարդի գլխարկը, բարի փերիի թևիկները, աքլորի փետրավոր թիկնոցը և այլն: 

Ներկայացումից առաջ անոնս նկարահանեցինք, որի սցենարը կազմեց և մոնտաժեց Հայկ Աղլամազյանը: Տաթև Գրիգորյանը պատրաստեց ներկայացման հրավիրատոմսի էլեկտրոնային տարբերակը, իսկ Ռուսլանը հաջորդ օրը տպեց և բերեց թղթե տարբերակները: 

Բաժանվեցին հրավիրատոմսերը, արվեցին բոլոր հրավերները, և վերջապես բեմադրեցինք: 

Մասնակիցների ոգևորությանը չափ չկար, նման համատեղ  և ջանքեր պահանջող աշխատանքները միշտ էլ հաջողված են և ստեղծում են հաճելի մտերմություն: 

Ներկայացումը այստեղ. 

Ճամփորդություններ 

Ձմեռային ճամբարի ամենահաճելի իրադարձությունը չմշկասահքն է, որի արդյունքում նոր հմտություններ են ձեռք բերվում, նաև բազմաթիվ սովորողներ առաջին անգամ զգում են չմուշկների վրա կանգնելու հմայքը: 

Սահադաշտ մասին ավելի մանրամասն՝ այստեղ: 

Լեռնանիստ: Ձմեռային ճամփորդությունների ևս մեկ հաճելի վայր. մի ամբողջ օր սահեցինք, շփվեցինք, սառեցինք ու տաքացանք վառարանի մոտ, թերմոսից տաք թեյ խմեցինք, իրար հյուրասիրեցինք, ձնագնդի խաղացինք և ձյան հրճվանքը զգացինք: 

Տեսանյութը  և լուսաբանումը՝ Հայկ Աղլամազյանի : 

Ազգագրական ստուգատես : Որպես ստուգատեսային  նախագիծ կենտրոնացանք ազգային խոհանոցի վրա, պատրաստեցինք թանապուր կամ սպաս: Հավես ընթացք ունեցավ, պարզվեց, որ սպասը սիրելի է բոլորի կողմից, իսկ մեր պատրաստածն՝ անչափ համեղ, քանի որ ոչ ոք չհրաժարվեց փորձել: 

Ավեմի մանրամասն՝ այստեղ: 

Խոհանոցային գործունեությունը շարունակեցինք նաև վերջին շաբաթը: Հաջող ներկայացումից հետո , որպես պարգևատրում, պատրաստեցինք և համտեսեցինք բոլորի սիրած պիցցան: Եվ՛ համեղ էր, և՛ հաճելի: 

Ճամբարային հանդիպումներ: Հերթկան հանդիպումն ունեցանք մարդաբան Հասմիկ Սիմոնյանի հետ: Մարդաբանությունը շատ հետաքրքիր մասնագիտություն է, որը թույլ է տալիս ավելի լավ ճանաչել մարդուն, նկատել  դարերի, հազարամյակների ընթացքում ֆիզիլոգիական փոփոխությունները, ուսումնասիրել պեղումների ընթացքում գտնված մարդկանց կմախքները: Այն հանդիպումներից էր, որ չէին դադարում սովորողների հարցերը, նկատվում էին հետաքրքրված հայացքներ: 

Մեր ճամբարային ջոկատով մասնակցեցինք նաև ուրբաթօրյա առավոտյան ժամերգության: Քայլքով հասանք Սուրբ Երրորդություն եկեղեցի, ունկնդրեցինք ժամերգությունը, երգեցինք սիրելի շարականները, միասնական ընթերցեցինք ,,Հավատով խոստովանիմ,, աղոթքը: 

Հունվարյան ճամբարը ամփոփեցինք եռօրյա ճամփորդությամբ դեպի Արատես՝ ձնե թագավորություն: Արատես երբեք այսքան տաք և հյուրընկալ չէր եղել, ինչքան այս անգամ, երբ ցերեկներն անցնում էին ձյան բերկրանքով , իսկ երեկոները՝ տաք վառարանի շուրջ՝ հաճելի զրույցներով, կարտաոֆիլի պլեճի պատրաստմամբ -հյուրասիրությամբ: Արատեսյան նախագծի կարևոր մասը Ղափմայի պատրաստումն ու ծեսն էր: 

Հունվարյան ճամբարը համարում եմ հաջողված, արդյունավետ: Սիրով եմ աշխատել իմ շուրջ հավաքված սովորողների հետ, սիրով ենք իրականացրել բոլոր նախագծերը, գուցե այդ պատճառով է, որ այդքան հաջողված արդյունքներ գրանցեցինք: 

Ճամբարային առաջին շաբաթվա ամփոփում

Սովորողների հաշվետվությունները. 

• Հայկ Աղլամազյանի հաշվետվությունը
• Անի Մինասյանի հաշվետվությունը
• Կարապետ Նշանյանի հաշվետվությունը
• Ռուսլան Հովսեփյանի հաշվետվությունը
• Էլեն Ավետիսյանի հաշվետվությունը
• Լինա Մկրտչյանի հաշվետվությունը՝ 1, 2 
• Ինեսա Պողոսյանի հաշվետվությունը 
• Արեգ Քեշիշյանի հաշվետվությունը
• Տաթև Օրդյանի հաշվետվությունը