Չարենց. առաջադրանքների մեդիափաթեթ

                                                      ,,Կարդում ենք,, նախագիծ

,,Կարդում ենք Չարենց,, նախագիծ 

Բանաստեղծությունների էլեկտրոնային ընթերցարան 

Բանաստեղծություններ 

1. Ոսկեփրփուր, ոսկեպուրպուր,

Փռեմ չորս դին, թափեմ բուռ-բուռ,

Երգերը իմ հրահրուն.

Երգով խնդամ թող բոլորին,

Որ մեռնելիս զգամ, որ իմ

Օրերն անցան ու չկորան։

2.

Դու – լուսե, անցար ու չկաս։

Դու – թեթե, անմարմին, անծիր։

Դու ուրի՛շ խնդության երազ։

Դու սրտում մեր ընդմիշտ վառեցիր

Կրակներ անմար ու թաքուն։

Փռեցիր լուսավոր գանձեր։

Եվ երբե՛ք, երբեք չի աղոտի

Քո կանթեղը խավար մեր հոգում -

Քո կանթեղը – հեռո՜ւ կարոտի։

2. Գրի՛ր տրված բառերի բացատրությունը:

Ոսկեփրփուր, անմար, կանթեղ, թաքուն:

3. Տրված բառերը բաժանիր մասերի և գրիր կազմությունը:

Անմարմին, անծիր, լուսավոր, խնդություն:

4. Տեքստում կանաչ ներկիր հոգնակի թվով գործածված գոյականները:

Ինչքան աշխարհը սիրես ու աշխարհով հիանաս -
Այնքան աշխարհը անուշ ու ցանկալի կլինի.
Թե ուզում ես չսուզվել ճահճուտները անհունի -
Պիտի աշխարհը սիրես ու աշխարհով հիանաս:
Այնպե՜ս արա, որ կյանքում ո՜չ մի գանգատ չիմանաս,
Խմի՜ր թախիծը հոգու, որպես հրճվանք ու գինի.
Որքան աշխարհը սիրես ու աշխարհով հիանաս -
Այնքան աշխարհը անուշ ու ցանկալի կլինի...
Ե. Չարենց

1. Բացատրի՛ր այս տողերը՝ Ինչքան աշխարհը սիրես ու աշխարհով հիանաս -
Այնքան աշխարհը անուշ ու ցանկալի կլինի:

2. Բացատրի՛ր բառերը՝ անհուն, գանգատ, հրճվանք:

3. Բանաստեղծությունը վերնագիր չունի, վերնագրի՛ր:

Գիտե՞ք, որ գարուն է արդեն,

Բոլորը թափվել են փողոց. 

Լսո՞ւմ եք անուշ մի զնգոց –

Գիտե՞ք, որ գարուն է արդեն։

Դյութում են շրթերը վարդե,

Սրտերը կրակ են ու բոց-

Գիտե՞ք, որ գարուն է արդեն,

Բոլորը թափվել են փողոց։​

Գրավոր ներկայացրու, թե ինչ է ասվում բանաստեղծության մեջ:

,,Ես իմ անուշ Հայաստանի,, բանաստեղծությունը, Ընթերցարան, էջ 175:

1. Դուրս գրի՛ր այն արտահայտությունները, որոնք 

Ա. նկարագրում են Հայաստանի բնությունը,

Բ. ներկայացնում են նրա մշակույթն ու պատմությունը:

2. Բացատրի՛ր մակդիրները՝ արևահամ բառ, հին սազի ողբանվագ և լացակումած լար, վիշապաձայն բուք, լուսապսակ ճակատ:

3. Դուրս գրի՛ր անհասկանալի բառերը և բացատրի՛ր:

Դու իմ գարնան առավոտ- ինչպե՞ս կանչեմ քեզ հիմա.
Դու հարազա՜տ, սրտիս մոտ – ինչպե՞ս կանչեմ քեզ հիմա:
Եվ դու, ոսկի իմ ամառ, հրանման, հրավառ,
Ամռան կեսօր դու իմ տոթ – ինչպե՞ս կանչեմ քեզ հիմա:
Եվ դու, ոսկի իմ աշուն, աշնան մրգի պես հասած,
Անուշացած մրգի հոտ – ինչպե՞ս կանչեմ քեզ հիմա:
Դուք բոլորդ հեռացել, մնացել եմ հիմա ծեր
Եվ իմ սրտով արյունոտ – ինչպե՞ս կանչեմ ձեզ հիմա:
Ահա սրտին իմ արդեն մոտեցել է մի պառավ
Ու բերել է մահվան բոթ – ինչպե՞ս կանչեմ ձեզ հիմա…

Առաջադրանքներ

1. Քո կարծիքով այս բանաստեղծությամբ ինչ է ուզում ասել Չարենցը:

2. Բացատրի՛ր բառերը՝ հրանման, տոթ, բոթ:

3. Բանաստեղծությունից դուրս գրի՛ր մակդիրները:

4. Ի՞նչ բառերով է Չարենցը  ներկայացնում /ինչպիսի/ գարունը, ամառը, աշունը:

5. Ո՞ր տողն է կրկնվում, քո կարծիքով այդ կրկնությունը ի՞նչ է տալիս բանաստեղծությանը:

6. Հորինի՛ր որևէ առակ կամ պատմություն, որից ,, Փոս փորողն ինքն է մեջն ընկնում,, եզրակացությունն արվի:

ՀԱՅՐԵՆԻՔՈՒՄ

Ձյունապատ լեռներ ու կապույտ լճեր:
Երկինքներ, որպես երազներ հոգու:
Երկինքներ, որպես մանկական աչեր:
Մենակ էի ես: Ինձ հետ էիր դու:
Երբ լսում էի մրմունջը լճի
Ու նայում էի թափանցիկ հեռուն -
Զարթնում էր իմ մեջ քո սուրբ անուրջի
Կորուստը այն հին, աստղայի՜ն, անհո՜ւն:
Կանչում էր, կանչում ձյունոտ լեռներում
Մեկը կարոտի իրիկնամուտին:
Իսկ գիշերն իջնում, ծածկում էր հեռուն
Խառնելով հոգիս աստղային մութին ...

1. Դուրս գրի՛ր մակդիրները:

2.  Մի քանի նախադասությամբ ներկայացրու բանաստեղծությունը:

3. Բացատրի՛ր բառերը՝ մրմունջ, անուրջ, անհուն:

Ապրում ես, շնչում ես, դու դեռ կաս — բայց ամե՛ն վայրկյան

դու ա՛յլ ես.

Անցյալ է դառնում քո ներկան — ու ամե՛ն վայրկյան

դու ա՛յլ ես.

Բայց ներկան քո — հո՛ւնտ է գալիքի՝ մեռնելով — նա
սնում է գալիքը,
Եվ այսպես– տևում ես դու երկար, — ու ամե՛ն վայրկյան
դու ա՛յլ ես:

1. Բացատրի՛ր բառերը՝ հունտ, սնել:

2. Գրավոր մեկնաբանի՛ր քառյակը:/6 նախադասություն/: Տեղադրի՛ր բլոգումդ, ինձ ուղարկիր հղումը/:

Ընտրել Չարենցի բանաստեղծություններից մեկը և պատրաստել ռադիոնյութ կամ տեսանյութ: